2023-06-05 09:10:35
Бозорга бораётган эдим. Одамлар гавжум ўтадиган кўча бошида йўлка четидаги панжарага бир унниқиб кетган қалин женфер илиб қўйилибди. Этагига бир қоғоз қистирилган, унга йирик-йирик ҳарфлар билан қўлда нималардир ёзилган эди. Ўтган-кетган бир оз тўхтаб, ўқиб, сўнг йўлида давом этарди.
Диққатимни тортди. Тўхтаб, ўқий бошладим:
"Мен муҳтожман. Нимагадир кейинги пайтлар бирор кимса менга қарамай қўйди. Бошқалар мендан ҳам муҳтож бўлиб қолгандир деб ўйладим. Бу қиш кунлари кимдир совуқдан дилдираб юрган бўлса, олсин, кийсин, совуқдан сақлансин деб борим-йўғим битта женферимни илдим. Олганга хурсанд бўламан, Аллоҳ ёрдамчиси бўлсин!"
Ичимда бирнима ғимирлади... Сўнг кетдим.
Юмушларимни битириб шомга яқин яна шу йўлдан ўтдим. Бояги женфер ҳам, ёзув ҳам хаёлимдан кўтарилган экан, одамларнинг тўпланиб тургани эсимга туширди.
Узун панжаранинг уч-тўрт метр қисмига ёзгию, қишки турли-туман кийим - кўйлаклар, кастюм-шимлар, женферлар, пальтолар, қалпоқлар... илиб ташланган, бари тоза, қимматбаҳо экани кўриниб турар эди. Панжарага тақаб қўйилган катта қоғоз қути оёқ кийимларию бошқа яна нималардир билан лиқ тўла.
Тўпланганларнинг кўзи қути қопқоғига ёпиштирилган катта қоғоздаги ёзувларда. Ўқир, муҳокама этар эди.
Қизиқиб, мен ҳам кўз югуртирдим:
"Мен бойман. Кийимларим ҳам кўп. Қишда совқотмайман, ёзда яйраб яшайман. Аммо хатингни ўқиб (уни худди менга ёзгандайсан), ўзимни яхшиликка сендан кўра муҳтожроқ ҳис этдим. Совуқдан жунжикдим гўё. Сен қолдирган женферни олиб кийган эдим, танамга илиқлик югурди. Умримда бунақа илиқликни туймаганман. Энди бу женферни ҳар қишда кияман! Ўрнига уйдаги бор кийимимни олиб келиб илдим. Булар сенинг ва сен каби яхши инсонларнинг ҳаққи. Адашиб, менда тўпланиб қолибди. Ҳаққингни ҳалол эт, дўстим!"
Бозордан кийим-кечак олиб қайтаётган эдим. Ичимда бирнима ғимирлади. Оғир елим халтани у қўлимдан бу қўлимга олиб, йўлимда кетавердим...
"Нафсимга ўгитлар" туркумидан.
https://t.me/MEXRIBONIM_OTAM_ONAM
4.0K views06:10