Junub odamni ko‘rgan kishiga ham g‘usl vojib bo‘ladimi? #Savo | Mubosharat

Junub odamni ko‘rgan kishiga ham g‘usl vojib bo‘ladimi?

#Savol: Junub odam junub emas kishiga qarasa, u ham g‘usl qilishi kerak bo‘ladimi? Ba’zi odamlar junub odamning nazari tushishi bilan pok odam ham harom bo‘ladi deydi.

Javob: Shariatimizda junub kishining g‘usl qilishi farz bo‘lib, imkon qadar tezroq yuvinishiga targ‘ib qilinadi. Chunki farishtalar junub kishiga yaqinlashmaydi va yana musulmon kishi doimo tahoratli yurishi mustahab hisoblanadi. Hadisi sharifda Payg‘ambarimiz sollallohu alayhi va sallam shunday deganlar:
ثَلَاثَةٌ لَا تَقْرَبُهُمْ الْمَلَائِكَةُ … وَالْجُنُبُ إِلا أَنْ يَتَوَضَّأَ» (رواه أبو داود عَنْ عَمَّارِ بْنِ يَاسِرٍ رَضِىَ اللَّهُ عَنْهُ)
Ya’ni: «Uch toifa odamga farishtalar yaqinlashmaydi… (ulardan biri) junub kishi bo‘lib, tahorat qilguniga qadar unga farishtalar yaqin kelmaydi»
Ammor ibn Yosir roziyallohu anhudan Abu Dovud rivoyati.
Lekin ba’zilarda junub kishiga nisbatan noto‘g‘ri tushunchalar mavjud. Masalan:
– junub kishini ko‘zi kimga tushsa yoki junub kishini kimdir ko‘rsa u odam ham g‘usl qilishi kerak;
– junub kishi biror narsani ushlashi, ovqat pishirishi mumkin emas, ushlagan narsasini harom qiladi;
– junub kishi hech kim bilan gaplashishi, salomlashishi va birga o‘tirishi mumkin emas...
Bu tushunchalarning barchasi asossiz bo‘lib, shariatimizning biror-bir ko‘rsatmalariga to‘g‘ri kelmaydi. Junub kishi zarurat bo‘lganda o‘zgalar bilan gaplashadi, salomlashadi, ko‘rishadi va birga o‘tirishi ham mumkin. Bu ishlarni tahorat qilgandan keyin yoki hech bo‘lmasa, qo‘l va yuzini yuvib, og‘iz-burnini chaygandan keyin qilishi afzaldir. Junub kishiga ko‘zi tushgan odam aslo g‘usl qilishi vojib bo‘lmaydi. Chunki Abu Hurayra raziyallohu anhu bir kuni junub holatlarida Rasululloh sollallohu alayhi va sallamni uzoqdan ko‘rib, o‘zlarini chetga olganlar. Gʻusl qilganlaridan keyin Rasululloh sollallohu alayhi va sallamning huzurlariga keldilar. Shunda u zot alayhissalom Abu Hurayradan o‘zlarini chetga olish sababi haqida so‘raganlarida, u kishi: «Junub edim, nopok holatimda siz bilan ko‘rishishni ma’qul ko‘rmadim», – deb javob bergan. Shunda Rasululloh sollallohu alayhi va sallam: «Subhanalloh (ajabo)! Mo‘min nopok bo‘lmaydi», – dedilar (Imom Buxoriy rivoyati).
Shunday ekan, musulmon kishi najas bo‘lmaydi, balki, tahoratsiz, junub holatda bo‘ladi. Junublik esa kishini namoz o‘qish, Qur’on tilovat qilish kabi ba’zi ibodatlardan man qilsa-da, insonni najasga aylantirib qo‘ymaydi va junublik bir odamdan boshqa odamga o‘tmaydi.
Demak, junub kishiga ko‘zi tushgan odam aslo g‘usl qilishi shart bo‘lmaydi. Vallohu a’lam.

O‘zbekiston musulmonlari idorasi

@Mubosharat