BIR NECHTA ALOQA UCHUN BIR MARTA GʻUSL QILISH Bismillahir roh | Mubosharat

BIR NECHTA ALOQA UCHUN BIR MARTA GʻUSL QILISH

Bismillahir rohmanir Rohim. Bir kechada bir necha marta jinsiy aloqa qilgan kishi har biriga g‘usl qilishi shart emas. Ammo jinsiy aloqadan so‘ng tahorat qilish va avrat a’zolarni yuvish mustahab. Bu haqda Payg‘ambarimiz sallallohu alayhi vasallam:

إذا أتَى أحَدُكُمْ أهْلَهُ، ثُمَّ أرادَ أنْ يَعُودَ، فَلْيَتَوَضَّأ بَيْنَهُمَا وُضُوأً (رواه الامام مسلم عن ابي سعيد الخدري رضي الله عنه)

ya’ni: “Sizlardan birortangiz o‘z ahli(ayoli)ga yaqinlik qilsa va yana yaqinlik qilishni xohlasa ikkalasini o‘rtasida tahorat qilsin”, – dedilar. (Imom Muslim rivoyatlari).

Boshqa bir hadisda Umar ibn Xattob raziyallohu anhu kechasi junub bo‘lganlari haqida Rasululloh sallallohu alayhi vasallamga zikr qilganlarida U zot alayhissalom:

تَوَضَّأْ وَ اغْسِلْ ذَكَرَكَ ثُمَّ نَمْ (متفق عليه).

ya’ni: “Tahorat qiling va zakar(avrat)ingizni yuving so‘ngra uxlang”, – dedilar.
Bu hadislar borasida alloma Mulla Ali Qori rahimahulloh “Mirqotul mafotih” nomli kitoblarida: “Ushbu hadislarda junub kishi yeyish, ichish, ayoliga yana yaqinlik qilish yoki uxlashni xohlasa, jinsiy a’zolarini yuvish va namozga tahorat qilgandek tahorat qilishi mustahab ekanligiga ishora bor” – deganlar.

Demak, bir kechada necha marotaba jinsiy aloqa qilsa ham, oxirida bir marta g‘usl qilishi vojib. Yaqinliklar orasida esa tahorat qilish va avrat a’zolarini yuvish bilan kifoyalanishlari ham mumkin. Bu ishlarning mustahab ekanligi yuqoridagi hadisi shariflardan ma’lum bo‘ldi. Ammo, imkoniyati bor kishilar har yaqinlikdan keyin g‘usl qilishlari shart bo‘lmasada, avlo ishdir. Vallohu a’lam.

O‘zbekiston musulmonlari idorasi
fatvo hay’ati

#fiqh

@Mubosharat