Serfarzandlik kambag‘allik keltiradimi? #Savol: Assalomu ala | Mubosharat

Serfarzandlik kambag‘allik keltiradimi?

#Savol: Assalomu alaykum, ustoz! Alloh umringizni va ilmingizni ziyoda qilsin. Ustoz, savolim bor edi: “Ko‘p farzandlik kambag‘allikka olib boradi”, deyishdi. Ba’zilari hadis ham bor, deb da’vo qilishdi. Men esa Ma’qil ibn Yasor roziyallohu anhu rivoyat qilgan: “Sizlar (erini) yaxshi ko‘radigan, tug‘adigan ayollarga uylaning! Zero, men sizlarning ko‘pligingiz bilan boshqa ummatlar oldida faxrlanaman”, dedilar” (Abu Dovud, Nasoiy, Ibn Hibbon va Tabaroniy rivoyati. Rivoyat sanadi sahih) hadisni keltirsam ham kifoya qilmadi. Chunki jamoatda shu kabi duo qilinibdi! Serfarzandlik kambag‘allik keltiradi, degan hadis bormi?

Javob (Odilxon qori Yunusxon o'g'li):

   Va alaykum assalom. Dinimizda nikohga qodir bo‘lgan banda uylanib, farzand ko‘rishga targ‘ib qilingan. Shunday hadislarning birida tug‘ishga salohiyatli ayolga uylanib, serfarzand bo‘linglar, sababi men qiyomatda boshqa ummatlar oldida sizlarning ko‘pligingiz bilan faxrlanaman, deyilgan. Shunga ko‘ra, serfarzand bo‘lishga harakat qilinadi. Bolalarni boqish yo tarbiya qila olmaslikdan qo‘rqib, farzand ko‘rmaslik joiz emas, deyiladi. Ayniqsa, kambag‘allikdan qo‘rqib bola ko‘rmaslik mumkinmas. Sababi, mo‘min banda “Rizqni Alloh beradi”, degan qat’iy e’tiqodda bo‘ladi.
Xullas, serfarzand bo‘lish kambag‘allikka sababdir degan gap yo‘q. Bu, Islom dini mohiyatiga ziddir. Vallohu a’lam!

@Mubosharat