Kun tarixi: 12-may – Xalqaro hamshiralar kuni Har yili 12-may | TIBBIYOT 💉
Kun tarixi: 12-may – Xalqaro hamshiralar kuni
Har yili 12-may – Xalqaro hamshiralar kuni sifatida nishonlanadi. Boshqacha qilib aytganda, bugun insonparvar kasblardan birining vakillaridan bo‘lgan hamshiralarga yana bir bor minnatdorlik bildirish va tabriklash uchun asos bor.
Hamshiralar – bu boshlang‘ich tibbiy ma’lumotga ega bo‘lgan va bemorlarga xizmat ko‘rsatishda shifokor yoki o‘rta tibbiyot xodimining ko‘rsatmalariga rioya qiladigan mutaxassislardir. Ular butun davolanish davrida bemor bilan bevosita ishlaydi. Hozirgi kunda hamshiralar tibbiyot xodimlarining eng katta toifasini o‘z ichiga oladi, chunki tibbiy amaliyotda tibbiy xizmatlarning katta qismi faqat hamshiralar tomonidan ta’minlanadi. Quyida ushbu insonparvar kasblardan biri haqida bir qancha ma’lumotlarni keltirib o‘tamiz.
• Hamshiralarning kasb bayrami urush davrida ularga dunyodagi birinchi xayriya xizmatini ko‘rsatgan mashhur ingliz ayollaridan biri Florens Naytingeylning tug‘ilgan kunida nishonlanadi.
• Florens Naytingeyl urushda dala shifoxonalarida hamshira sifatida ishlagan va hamshira ishining asoschisi hamda bosh targ‘ibotchisi bo‘lgan. U 38 nafar yordamchisi bilan birgalikda sanitariya va yaradorlarga g‘amxo‘rlik qilish qoidalarini hayotga tatbiq etdi. Natijada, 6 oydan kam vaqt ichida shifoxonalarda o‘lim darajasi 42 foizdan 2,2 foizga tushdi.
• Shuningdek, Naytingeyl armiyadagi tibbiy xizmatni tashkil qilish va hamshiralarning ishini ommalashtirishga erishdi.
• 1912-yilda Florens Naytingeyl medali ta’sis etildi. Ushbu mukofot hali ham butun dunyodagi hamshiralar uchun eng sharafli mukofot hisoblanadi.
• Hamshiralar kuni 141 mamlakatdan kelgan hamshiralar professional jamoat tashkiloti – Xalqaro hamshiralar kengashiga birlashtirilgan vaqtdan boshlab nishonlanadi.
• Oddiy shifoxona yoki klinikada ishlaydigan hamshiralarning 80 foizini ayollar tashkil etadi.
• Hamshiralar ishiga qarab turli toifalarga bo‘linadi. Masalan, bosh hamshira, katta hamshira, palata hamshirasi, davolovchi hamshira, jarrohlik hamshirasi, tuman hamshirasi va parhez hamshirasi (tibbiy ovqatlanish uchun javobgar) toifalari mavjud. Shuningdek, ixtisoslashgan shiforkorlar bilan bemorlarni qabul qiluvchi hamshiralar ham bor.
• Hamshiralar mustaqil ravishda tekshiruv o‘tkazishi, bemorga tashxis qo‘yishi va davolashi mumkin emas. Hamshira ko‘proq shifokorning ko‘rsatmalariga rioya qiladi va haroratni o‘lchaydi, bemorlarni emlaydi, shifokorlarga jarrohlik amaliyotlari hamda tibbiy muolajalarni bajarishda yordam beradi, bemorlarga shifokorlar tomonidan buyurilgan darmonlarni beradi, bemorning ahvoli va farovonligini kuzatadi, har tomonlama parvarish qiladi.
Barcha hamshiralarni kasb bayrami bilan qutlaymiz va ularning pandemiya davrida bemorlarning salomatligi yo‘lida ko‘rsatayotgan xizmatlari uchun minnatdorlik bildiramiz!
TIBBIYOT KANALI Obuna bo'ling!
