2022-06-20 07:00:03
Xorazmda e’tibordan chetda qolgan 100 dan ziyod madaniy meros obyektlari restavratsiya qilinishi kutilmoqda
“2022 — 2026-yillarda Xorazm viloyatida joylashgan madaniy meros obyektlarini restavratsiya qilish, ularga olib boruvchi infratuzilmani tiklash hamda “Ichan qal’a” davlat muzey-qo‘riqxonasining filiallarini tashkil etish chora-tadbirlari to‘g‘risida”gi qaror loyihasi jamoatchilik muhokamasiga qoʻyiladi.
Qayd etilishicha, loyiha Madaniy meros agentligi tomonidan yaratilgan. Unga ko‘ra, “Ichan qal’a” davlat muzey-qo‘riqxonasining yangi muzey filiallari tashkil etiladi. Ushbu muassasalarda Arab Muhammadxon madrasasida saqlanayotgan 56 mingta nodir topilma va buyumlardan iborat eksponatlar saqlanadi va namoyish qilinadi.
Agentlik va Xorazm viloyati hokimliklari tomonidan uch oy muddatda:
• “Ichan qal’a” davlat muzey-qo‘riqxonasining Ko‘hna ark majmuasi zarbxona binosida Xorazm xonligi zarbxonasi tarixi muzeyi, Polvon qori savdo uyi binosida Oq masjid mennonitlari tarixi muzeyi, Xiva tumani, Ogahiy uyida Ogahiy uy-muzeyi, Deshon qal’ada joylashgan Hazorasp darvozasida Xorazm madaniyati va tarixi muzeylari tashkil qilinadi;
• muzeylar nizomi ishlab chiqiladi, tasdiqlanadi va belgilangan tartibda davlat ro‘yxatidan o‘tkaziladi;
• muzeylarning shtatlar jadvali belgilangan tartibda ishlab chiqiladi va tasdiqlanadi hamda malakali kadrlar bilan to‘ldiriladi;
• muzeylarga zamonaviy interfaol axborot-kommunikatsiya texnologiyalari joriy etiladi;
• muzeylarda madaniy-ma’rifiy tadbirlar, davra suhbatlari, ijodiy uchrashuvlar tashkil etiladi;
• manfaatdor vazirliklar va idoralar bilan birgalikda muzeylar ekspozitsiyasini muzey ashyolari bilan to‘ldirish choralari ko‘riladi;
• muzeylarga sayyohlarni keng jalb etilishi choralarini ko‘riladi.
Shuningdek, Xorazm viloyatida 2022—2026-yillarda e’tibordan chetda qolgan 100 dan ziyod madaniy meros obyektlarini restavratsiya qilish hamda ularga olib boruvchi infratuzilmani yaxshilash bo‘yicha chora-tadbirlar rejasi tasdiqlangan.
Xorazmbugun xabarlari
4.4K views04:00